კალიფორნიის სასამართლომ არ დააკმაყოფილა კომპანია Netflix-ის შუამდგომლობა, შეწყვეტილიყო მის წინააღმდეგ მოჭადრაკე ნონა გაფრინდაშვილის სარჩელის საფუძველზე დაწყებული საქმის წარმოება.

ამის შესახებ ინფორმაციას იურიდიული კომპანია BLB ავრცელებს, რომელიც სასამართლოში გრანდმაისტერის ინტერესებს იცავს. 

"იურიდიული ფირმა BLB საქართველოს ულოცავს ქალბატონი ნონა გაფრინდაშვილის კიდევ ერთ გამარჯვებას კალიფორნიაში!

მოსამართლე ვირჯინია ფილიპსმა არ დააკმაყოფილა კინოინდუსტრიის მაგნატის, Netflix-ის შუამდგომლობა საქმის წარმოების შეწყვეტის შესახებ.

მოსამართლემ არ გაიზიარა Netflix-ის არგუმენტაცია გამოხატვის თავისუფლებით დაცვასთან დაკავშირებით.

გილოცავთ ამ გამარჯვებას!" - წერს კომპანია Facebook-ზე. 

ცნობისთვის, ლეგენდარულმა ქართველმა მოჭადრაკემ ნონა გაფრინდაშვილმა Netflix-ის წინააღმდეგ აშშ-ში, კალიფორნიის შტატში, სასამართლოში სარჩელი 16 სექტემბერს შეიტანა. 

სარჩელი ეხება Netflix-ის მიერ სერიალ "ლაზიერის გამბიტის" (The Queen’s Gambit) კულმინაციურ ეპიზოდში მიზანმიმართულად გაჟღერებულ მცდარ ცნობებს, ნონა გაფრინდაშვილის ლეგენდარული კარიერული მიღწევების შესახებ.